Нийслэлийн Засаг даргын захирамжаар 2022 оны тавдугаар сарын 28-ны бямба гарагийг “Автомашингүй өдөр” болгохоор шийдвэрлэлээ. Мөн эл өдөр “Улаанбаатар марафон-2022” олон улсын гүйлтийн тэмцээнийг хамтатган зохион байгуулах юм.
ᠨᠡᠶᠢᠰᠯᠡᠯ ᠦ᠋ᠨ ᠵᠠᠰᠠᠭ ᠳᠠᠷᠤᠭᠠ ᠶ᠋ᠢᠨ ᠵᠠᢈᠢᠷᠤᠮᠵᠢ ᠪᠠᠷ ᠒᠐᠒᠒ ᠣᠨ ᠤ᠋ ᠲᠠᠪᠤᠳᠤᠭᠠᠷ ᠰᠠᠷᠠ ᠶ᠋ᠢᠨ ᠒᠘ ᠶ᠋ᠢᠨ ᠪᠢᠮᠪᠠ ᠭᠠᠷᠠᠭ ᠢ᠋ “ᠠᠦᠲ᠋ᠤᠮᠠᠰᠢᠨ ᠦᢉᠡᠢ ᠡᠳᠦᠷ” ᠪᠣᠯᠭᠠᠬᠤ ᠪᠠᠷ ᠰᠢᠶᠢᠳᠪᠦᠷᠢᠯᠡᠯᠡ᠃ ᠮᠥᠨ ᠡᠯ ᠡᠳᠦᠷ “ᠤᠯᠠᠭᠠᠨᠪᠠᠭᠠᠲᠤᠷ ᠮᠠᠷᠠᠹᠤᠨ ᠒᠐᠒᠒” ᠣᠯᠠᠨ ᠤᠯᠤᠰ ᠤ᠋ᠨ ᢉᠦᠶᠦᠯᠲᠡ ᠶ᠋ᠢᠨ ᠲᠡᠮᠡᠴᠡᢉᠡᠨ ᠢ᠋ ᠬᠠᠮᠲᠤᠳᠬᠠᠨ ᠵᠣᢈᠢᠶᠠᠨ ᠪᠠᠶᠢᠭᠤᠯᠬᠤ ᠶᠠᠭᠤᠮᠠ᠃
ХЭВТЭЭ ЧИГЛЭЛИЙН ГОЛ ЗАМУУДЫН ХӨДӨЛГӨӨНИЙГ ХЯЗГААРЛАНА
ᢈᠡᠪᠲᠡᢉᠡ ᠴᠢᢉᠯᠡᠯ ᠦ᠋ᠨ ᠭᠣᠣᠯ ᠵᠠᠮ ᠤ᠋ᠳ ᠤ᠋ᠨ ᢈᠥᠳᠡᠯᢉᠡᢉᠡᠨ ᠢ᠋ ᢈᠢᠵᠠᠭᠠᠷᠯᠠᠨᠠ
“Автомашингүй өдөр”-өөр нийслэлийн хэвтээ чиглэлийн гол зам болох Энхтайваны өргөн чөлөө болон хотын төвийн Их тойруугийн замууд, гудамжаар тодотговол, Сөүлийн болон Бээжин, Анкара, Сүхбаатар, Их сургууль, Элчин, Хөх тэнгэр, Партизан, Олимп, Самбуугийн гудамжны авто замын хөдөлгөөнийг хязгаарлах юм байна. Тодруулбал, Зүүн 4 замаас Баруун 4 зам хүртэл, мөн Гэсэр сүмээс Зоос гоёл хүртэл, Хүнсний дөрөвдүгээр дэлгүүрээс Хятадын Элчин сайдын яам хүртэл, тэндээс Сансарын туннел хүртэлх замын хөдөлгөөнийг хаана. Тэрхүү замаар “Улаанбаатар марафон-2022” олон улсын гүйлт болох юм.
“ᠠᠦᠲ᠋ᠤᠮᠠᠰᠢᠨ ᠦᢉᠡᠢ ᠡᠳᠦᠷ”᠆ ᠪᠡᠷ ᠨᠡᠶᠢᠰᠯᠡᠯ ᠦ᠋ᠨ ᢈᠡᠪᠲᠡᢉᠡ ᠴᠢᢉᠯᠡᠯ ᠦ᠋ᠨ ᠭᠣᠣᠯ ᠵᠠᠮ ᠪᠣᠯᠬᠤ ᠡᠩᢈᠡᠲᠠᠶᠢᠪᠤᠩ ᠤ᠋ᠨ ᠥᠷᢉᠡᠨ ᠴᠢᠯᠦᢉᠡ ᠪᠣᠯᠤᠨ ᠬᠣᠲᠠ ᠶ᠋ᠢᠨ ᠲᠥᠪ ᠦ᠋ᠨ ᠶᠡᢈᠡ ᠲᠣᠭᠤᠷᠢᠭᠤ ᠶ᠋ᠢᠨ ᠵᠠᠮ ᠤ᠋ᠳ᠂ ᠭᠤᠳᠤᠮᠵᠢ ᠪᠠᠷ ᠲᠣᠳᠤᠳᠬᠠᠪᠠᠯ᠂ ᠰᠧᠦᠯᠢ ᠶ᠋ᠢᠨ ᠪᠣᠯᠤᠨ ᠪᠡᢉᠡᠵᠢᠩ᠂ ᠠᠨᠻᠠᠷᠠ᠂ ᠰᠦᢈᠡᠪᠠᠭᠠᠲᠤᠷ᠂ ᠶᠡᢈᠡ ᠰᠤᠷᠭᠠᠭᠤᠯᠢ᠂ ᠡᠯᠴᠢᠨ᠂ ᢈᠥᢈᠡ ᠲᠩᠷᠢ᠂ ᠫᠠᠷᠲ᠋ᠢᠽᠠᠨ᠋᠂ ᠣᠯᠢᠮᠫ᠂ ᠰᠠᠮᠪᠤᠤ ᠶ᠋ᠢᠨ ᠭᠤᠳᠤᠮᠵᠢ ᠶ᠋ᠢᠨ ᠠᠦᠲ᠋ᠤ ᠵᠠᠮ ᠤ᠋ᠨ ᢈᠥᠳᠡᠯᢉᠡᢉᠡᠨ ᠢ᠋ ᢈᠢᠵᠠᠭᠠᠷᠯᠠᠬᠤ ᠶᠠᠭᠤᠮᠠ ᠪᠠᠶᠢᠨᠠ᠃ ᠲᠣᠳᠤᠷᠠᠭᠤᠯᠪᠠᠯ᠂ ᠵᠡᢉᠦᠨ ᠔ ᠵᠠᠮ ᠠ᠋ᠴᠠ ᠪᠠᠷᠠᠭᠤᠨ ᠔ ᠵᠠᠮ ᢈᠦᠷᠲᠡᠯᠡ᠂ ᠮᠥᠨ ᢉᠡᠰᠡᠷ ᠰᠦᠮᠡ ᠡᠴᠡ ᠵᠣᠭᠤᠰ ᠭᠣᠶᠤᠯ ᢈᠦᠷᠲᠡᠯᠡ᠂ ᢈᠦᠨᠡᠰᠦᠨ ᠦ᠋ ᠳᠥᠷᠪᠡᠳᠦᢉᠡᠷ ᠳᠡᠯᢉᠡᢉᠦᠷ ᠡᠴᠡ ᢈᠢᠲᠠᠳ ᠤ᠋ᠨ ᠡᠯᠴᠢᠨ ᠰᠠᠶᠢᠳ ᠤ᠋ᠨ ᠶᠠᠮᠤ ᢈᠦᠷᠲᠡᠯᠡ᠂ ᠲᠡᠨᠳᠡ ᠡᠴᠡ ᠰᠠᠨᠰᠠᠷ ᠤ᠋ᠨ ᠲᠦᠨᠨᠧᠯ ᢈᠦᠷᠲᠡᠯᠡᢈᠢ ᠵᠠᠮ ᠤ᠋ᠨ ᢈᠥᠳᠡᠯᢉᠡᢉᠡᠨ ᠢ᠋ ᠬᠠᠮᠢᠭᠠ᠃ ᠲᠡᠷᠡᢈᠦ ᠵᠠᠮ ᠢ᠋ᠶᠠᠷ “ᠤᠯᠠᠭᠠᠨᠪᠠᠭᠠᠲᠤᠷ ᠮᠠᠷᠠᠹᠤᠨ ᠒᠐᠒᠒” ᠣᠯᠠᠨ ᠤᠯᠤᠰ ᠤ᠋ᠨ ᢉᠦᠶᠦᠯᠲᠡ ᠪᠣᠯᠬᠤ ᠶᠠᠭᠤᠮᠠ᠃
“Автомашингүй өдөр”-ийг зохион байгуулахтай холбоотойгоор нийтийн тээврийн 30 гаруй чиглэлд өөрчлөлт ордог. Одоогоор чиглэлийн өөрчлөлт хараахан батлагдаагүй байна. Мөн өдөр Сүхбаатарын талбайд Европын холбооны улсуудын өдөрлөг, үзэсгэлэн яармагийг зохион байгуулна.
“ᠠᠦᠲ᠋ᠤᠮᠠᠰᠢᠨ ᠦᢉᠡᠢ ᠡᠳᠦᠷ”᠆ ᠶ᠋ᠢ ᠵᠣᢈᠢᠶᠠᠨ ᠪᠠᠶᠢᠭᠤᠯᠬᠤ ᠲᠠᠢ ᠬᠣᠯᠪᠤᠭᠠ ᠲᠠᠢ ᠪᠠᠷ ᠨᠡᠶᠢᠲᠡ ᠶ᠋ᠢᠨ ᠲᠡᢉᠡᢉᠡᠪᠦᠷᠢ ᠶ᠋ᠢᠨ ᠓᠐ ᠭᠠᠷᠤᠢ ᠴᠢᢉᠯᠡᠯ ᠳ᠋ᠦ ᠥᢉᠡᠷᠡᠴᠢᠯᠡᠯᠲᠡ ᠣᠷᠤᠳᠠᠭ᠃ ᠣᠳᠤ ᠪᠠᠷ ᠴᠢᢉᠯᠡᠯ ᠦ᠋ᠨ ᠥᢉᠡᠷᠡᠴᠢᠯᠡᠯᠲᠡ ᠬᠠᠷᠠᠬᠠᠨ ᠪᠠᠲᠤᠯᠠᠭᠳᠠᠭᠠ ᠦᢉᠡᠢ ᠪᠠᠶᠢᠨᠠ᠃ ᠮᠥᠨ ᠡᠳᠦᠷ ᠰᠦᢈᠡᠪᠠᠭᠠᠲᠤᠷ ᠤ᠋ᠨ ᠲᠠᠯᠠᠪᠠᠢ ᠳ᠋ᠤ ᠧᠦ᠋ᠷᠣᠫᠠ ᠶ᠋ᠢᠨ ᠬᠣᠯᠪᠤᠭᠠᠨ ᠤ᠋ ᠤᠯᠤᠰ ᠤ᠋ᠳ ᠤ᠋ᠨ ᠡᠳᠦᠷᠯᠢᢉ᠂ ᠦᠵᠡᠰᢈᠦᠯᠡᠩ ᠶᠠᠭᠠᠷᠮᠠᠭ ᠢ᠋ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠨᠠ᠃
“УЛААНБААТАР МАРАФОН-2022”-Д ОРОЛЦОГЧДЫГ ТАВДУГААР САРЫН 20-Н ХҮРТЭЛ БҮРТГЭНЭ
“ᠤᠯᠠᠭᠠᠨᠪᠠᠭᠠᠲᠤᠷ ᠮᠠᠷᠠᠹᠤᠨ ᠒᠐᠒᠒”᠆ ᠳ ᠣᠷᠤᠯᠴᠠᠭᠴᠢᠳ ᠢ᠋ ᠲᠠᠪᠤᠳᠤᠭᠠᠷ ᠰᠠᠷᠠ ᠶ᠋ᠢᠨ ᠒᠐ ᠨ ᢈᠦᠷᠲᠡᠯᠡ ᠪᠦᠷᠢᠳᢈᠡᠨᠡ
Цар тахлын улмаас хоёр жил өнжсөн “Улаанбаатар марафон-2022” олон улсын гүйлт нь Монгол Улсад гүйлтийн спортыг хөгжүүлэх, гүйлтээр хичээллэгч, сонирхогч иргэдийн тоог нэмэгдүүлэх, өсвөр, залуу үеийнхэнд өөрийн дотоод нөөц боломжийг нээж, зорилгодоо хүрэх тэсвэр хатуужил, бие бялдрын болон оюун санааны өв тэгш хүмүүжлийг төлөвшүүлэх зорилготой. 2014 оноос эхэлсэн марафон гүйлтэд оролцогчдын тоо жилээс жилд өсөн нэмэгдсээр иржээ. 2014 онд 16.839, 2015 онд 18.085, 2016 онд 25.000, 2017, 2018 онд 30.000, 2019 онд 32.000 гаруй иргэн оролцжээ. Гүйлтэд нийслэлийн иргэдээс гадна хөдөө, орон нутаг, Монгол Улсад ажиллаж, амьдарч байгаа гадаадын иргэд, хөрш зэргэлдээ орны гүйлт сонирхогчид болон олон улс, тив, дэлхийд танигдсан нэртэй тамирчид ч оролцдог онцлогтой. Энэ жилийн хувьд 21 км, 095 м-ийн зайг 18-34, 35-54, 55-аас дээш нас, 5 км-ийн зайг 12-17 нас, 18-аас дээш насны эрүүл мэндийн гүйлт гэсэн ангилалтай болгон өөрчилжээ.
ᠴᠠᠷ ᠲᠠᠬᠤᠯ ᠤ᠋ᠨ ᠤᠯᠠᠮ ᠠ᠋ᠴᠠ ᠬᠣᠶᠠᠷ ᠵᠢᠯ ᠥᠨᠵᠢᢉᠰᠡᠨ “ᠤᠯᠠᠭᠠᠨᠪᠠᠭᠠᠲᠤᠷ ᠮᠠᠷᠠᠹᠤᠨ ᠒᠐᠒᠒” ᠣᠯᠠᠨ ᠤᠯᠤᠰ ᠤ᠋ᠨ ᢉᠦᠶᠦᠯᠲᠡ ᠨᠢ ᠮᠣᠩᠭᠣᠯ ᠤᠯᠤᠰ ᠲᠤ ᢉᠦᠶᠦᠯᠲᠡ ᠶ᠋ᠢᠨ ᠰᠫᠣᠷᠲ ᠢ᠋ ᢈᠥᢉᠵᠢᢉᠦᠯᢈᠦ᠂ ᢉᠦᠶᠦᠯᠲᠡ ᠪᠡᠷ ᢈᠢᠴᠢᠶᠡᠯᠯᠡᢉᠴᠢ᠂ ᠰᠣᠨᠢᠷᠬᠠᠭᠴᠢ ᠢᠷᢉᠡᠳ ᠦ᠋ᠨ ᠲᠣᠭᠠ ᠶ᠋ᠢ ᠨᠡᠮᠡᢉᠳᠡᢉᠦᠯᢈᠦ᠂ ᠥᠰᠪᠦᠷᠢ᠂ ᠵᠠᠯᠠᠭᠤ ᠦᠶᠡ ᠶ᠋ᠢᠨ ᢈᠢᠨ ᠳ᠋ᠦ ᠥᠪᠡᠷ ᠦ᠋ᠨ ᠳᠣᠲᠤᠭᠠᠳᠤ ᠨᠥᢉᠡᠴᠡ ᠪᠣᠯᠤᠮᠵᠢ ᠶ᠋ᠢ ᠨᠡᢉᠡᢉᠡᠵᠦ᠂ ᠵᠣᠷᠢᠯᠭᠠ ᠳ᠋ᠤ ᠪᠠᠨ ᢈᠦᠷᢈᠦ ᠲᠡᠰᠪᠦᠷᠢ ᠬᠠᠲᠠᠭᠤᠵᠢᠯ᠂ ᠪᠡᠶᠡ ᠪᠢᠯᠳᠠᠷ ᠤ᠋ᠨ ᠪᠣᠯᠤᠨ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠥᠪ ᠲᠡᢉᠰᠢ ᢈᠦᠮᠦᠵᠢᠯ ᠢ᠋ ᠲᠥᠯᠦᠪᠰᠢᢉᠦᠯᢈᠦ ᠵᠣᠷᠢᠯᠭᠠ ᠲᠠᠢ᠃ ᠒᠐᠑᠔ ᠣᠨ ᠠ᠋ᠴᠠ ᠡᢈᠢᠯᠡᢉᠰᠡᠨ ᠮᠠᠷᠠᠹᠣᠨ ᢉᠦᠶᠦᠯᠲᠡ ᠳ᠋ᠦ ᠣᠷᠤᠯᠴᠠᠭᠴᠢᠳ ᠤ᠋ᠨ ᠲᠣᠭᠠ ᠵᠢᠯ ᠡᠴᠡ ᠵᠢᠯ ᠳ᠋ᠦ ᠥᠰᠦᠨ ᠨᠡᠮᠡᢉᠳᠡᢉᠰᠡᢉᠡᠷ ᠢᠷᠡᠵᠡᠢ᠃ ᠒᠐᠑᠔ ᠣᠨ ᠳ᠋ᠤ ᠑᠖᠂᠘᠓᠙᠂ ᠒᠐᠑᠕ ᠣᠨ ᠳ᠋ᠤ ᠑᠘᠂᠐᠘᠕᠂ ᠒᠐᠑᠖ ᠣᠨ ᠳ᠋ᠤ ᠒᠕᠂᠐᠐᠐᠂ ᠒᠐᠑᠗᠂ ᠒᠐᠑᠘ ᠣᠨ ᠳ᠋ᠤ ᠓᠐᠂᠐᠐᠐᠂ ᠒᠐᠑᠙ ᠣᠨ ᠳ᠋ᠤ ᠓᠒᠂᠐᠐᠐ ᠭᠠᠷᠤᠢ ᠢᠷᢉᠡᠨ ᠣᠷᠤᠯᠴᠠᠵᠡᠢ᠃ ᢉᠦᠶᠦᠯᠲᠡ ᠳ᠋ᠦ ᠨᠡᠶᠢᠰᠯᠡᠯ ᠦ᠋ᠨ ᠢᠷᢉᠡᠳ ᠡᠴᠡ ᠭᠠᠳᠠᠨᠠ ᢈᠥᠳᠡᢉᠡ᠂ ᠣᠷᠤᠨ ᠨᠤᠲᠤᠭ᠂ ᠮᠣᠩᠭᠣᠯ ᠤᠯᠤᠰ ᠲᠤ ᠠᠵᠢᠯᠯᠠᠵᠤ᠂ ᠠᠮᠢᠳᠤᠷᠠᠵᠤ ᠪᠠᠶᠢᠭᠠ ᠭᠠᠳᠠᠭᠠᠳᠤ ᠶ᠋ᠢᠨ ᠢᠷᢉᠡᠳ᠂ ᢈᠥᠷᠰᠢ ᠵᠡᠷᢉᠡᠯᠡᠯᠳᠦᢉᠡ ᠣᠷᠤᠨ ᠤ᠋ ᢉᠦᠶᠦᠯᠲᠡ ᠰᠣᠨᠢᠷᠬᠠᠭᠴᠢᠳ ᠪᠣᠯᠤᠨ ᠣᠯᠠᠨ ᠤᠯᠤᠰ᠂ ᠲᠢᠶᠢᠪ᠂ ᠳᠡᠯᠡᢈᠡᠢ ᠳ᠋ᠦ ᠲᠠᠨᠢᠭᠳᠠᠭᠰᠠᠨ ᠨᠡᠷᠡ ᠲᠡᠢ ᠲᠠᠮᠢᠷᠴᠢᠳ ᠴᠤ ᠣᠷᠤᠯᠴᠠᠳᠠᠭ ᠣᠨᠴᠠᠯᠢᠭ ᠲᠠᠢ᠃ ᠡᠨᠡ ᠵᠢᠯ ᠦ᠋ᠨ ᠬᠤᠪᠢ ᠳ᠋ᠤ ᠒᠑ ᠻᠮ᠂ ᠐᠙᠕ ᠮ ᠮᠣ᠋ ᠶ᠋ᠢᠨ ᠵᠠᠢ ᠶ᠋ᠢ ᠑᠘ ᠆ ᠓᠔᠂ ᠓᠕᠆ ᠕᠔᠂ ᠕᠕᠆ ᠠᠴᠠ ᠳᠡᢉᠡᢉᠰᠢ ᠨᠠᠰᠤ᠂ ᠕ ᠻᠮ ᠆ ᠶᠣᠨ ᠵᠠᠢ ᠶ᠋ᠢ ᠑᠒᠆᠑᠗ ᠨᠠᠰᠤ᠂ ᠑᠘᠆ ᠠ᠋ᠴᠠ ᠳᠡᢉᠡᢉᠰᠢ ᠨᠠᠰᠤᠨ ᠤ᠋ ᠡᠷᠡᢉᠦᠯ ᠮᠡᠨᠳᠦ ᠶ᠋ᠢᠨ ᢉᠦᠶᠦᠯᠲᠡ ᢉᠡᢉᠰᠡᠨ ᠠᠩᢉᠢᠯᠠᠯ ᠲᠠᠢ ᠪᠣᠯᠭᠠᠨ ᠥᢉᠡᠷᠡᠴᠢᠯᠡᠵᠡᠢ᠃
Олон улсын гүйлтийн тэмцээнийг угтан Нийслэлийн Засаг даргын нэрэмжит “Улаанбаатар марафонд нэгдэцгээе” цомыг нийслэл, дүүргийн хэмжээнд 60 хоногийн хугацаатай аялуулж байна. “Улаанбаатар марафон-2022” олон улсын гүйлтийн онлайн бүртгэлийг www.marathon.ulaanbaatar.mn сайтаар болон нийслэл, дүүргийн Биеийн тамир, спортын хороодоос томилогдсон мэргэжилтнүүд хариуцан явуулж буй. Тэмцээний бүртгэл тавдугаар сарын 20-н хүртэл үргэлжилнэ.
ᠣᠯᠠᠨ ᠤᠯᠤᠰ ᠤ᠋ᠨ ᢉᠦᠶᠦᠯᠲᠡ ᠶ᠋ᠢᠨ ᠲᠡᠮᠡᠴᠡᢉᠡᠨ ᠢ᠋ ᠤᠭᠲᠤᠨ ᠨᠡᠶᠢᠰᠯᠡᠯ ᠦ᠋ᠨ ᠵᠠᠰᠠᠭ ᠳᠠᠷᠤᠭᠠ ᠶ᠋ᠢᠨ ᠨᠡᠷᠡᠮᠵᠢᠲᠦ “ᠤᠯᠠᠭᠠᠨᠪᠠᠭᠠᠲᠤᠷ ᠮᠠᠷᠠᠹᠤᠨ ᠳ᠋ᠤ ᠨᠢᢉᠡᠳᠴᠡᢉᠡᠶᠡ” ᠴᠣᠮᠤ ᠶ᠋ᠢ ᠨᠡᠶᠢᠰᠯᠡᠯ᠂ ᠳᠡᢉᠦᠷᢉᠡ ᠶ᠋ᠢᠨ ᢈᠡᠮᠵᠢᠶ ᠡᠨ ᠳ᠋ᠦ ᠖᠐ ᠬᠣᠨᠤᠭ ᠤ᠋ᠨ ᠬᠤᠭᠤᠴᠠᠭᠠ ᠲᠠᠢ ᠠᠶᠠᠯᠠᠭᠤᠯᠵᠤ ᠪᠠᠶᠢᠨᠠ᠃ “ᠤᠯᠠᠭᠠᠨᠪᠠᠭᠠᠲᠤᠷ ᠮᠠᠷᠠᠹᠤᠨ ᠒᠐᠒᠒” ᠣᠯᠠᠨ ᠤᠯᠤᠰ ᠤ᠋ᠨ ᢉᠦᠶᠦᠯᠲᠡ ᠶ᠋ᠢᠨ ᠣᠨ᠋ᠯᠠᠶᠢᠨ ᠪᠦᠷᠢᠳᢈᠡᠯ ᠢ᠋ www᠃marathon᠃ulaanbaatar᠃mn ᠰᠠᠶᠢᠲ ᠢ᠋ᠶᠠᠷ ᠪᠣᠯᠤᠨ ᠨᠡᠶᠢᠰᠯᠡᠯ᠂ ᠳᠡᢉᠦᠷᢉᠡ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠲᠠᠮᠢᠷ᠂ ᠰᠫᠤᠷᠲ ᠤ᠋ᠨ ᠬᠣᠷᠢᠶᠠᠳ ᠠ᠋ᠴᠠ ᠲᠣᠮᠢᠯᠠᠭᠳᠠᠭᠰᠠᠨ ᠮᠡᠷᢉᠡᠵᠢᠯᠲᠡᠨ ᠨᠦ᠋ᢉᠦᠳ ᠬᠠᠷᠢᠭᠤᠴᠠᠨ ᠶᠠᠪᠤᠭᠤᠯᠵᠤ ᠪᠤᠢ᠃ ᠲᠡᠮᠡᠴᠡᢉᠡᠨ ᠦ᠋ ᠪᠦᠷᠢᠳᢈᠡᠯ ᠲᠠᠪᠤᠳᠤᠭᠠᠷ ᠰᠠᠷᠠ ᠶ᠋ᠢᠨ ᠒᠐ ᠨ ᢈᠦᠷᠲᠡᠯᠡ ᠦᠷᢉᠦᠯᠵᠢᠯᠡᠨᠡ᠃
