Нийслэлийн Засаг даргын нэрэмжит ширээний теннисний Улаанбаатар хотын аварга шалгаруулах тэмцээн боллоо. Тэмцээнд 16 клубийн 130 орчим тамирчин оролцсон бөгөөд олон улсын эрхтэй 14 шүүгч ажиллажээ. Энэ жилийн хувьд нийслэлийн есөн дүүргээс гадна 21 аймгийн тамирчид нээлттэй оролцож байгаагаараа онцлог. ᠨᠡᠶᠢᠰᠯᠡᠯ ᠦ᠋ᠨ ᠵᠠᠰᠠᠭ ᠳᠠᠷᠤᠭᠠ ᠶ᠋ᠢᠨ ᠨᠡᠷᠡᠮᠵᠢᠲᠦ ᠰᠢᠷᠡᢉᠡᠨ ᠦ᠋ ᠲᠧᠨᠨᠢᠰ ᠦ᠋ᠨ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠶ᠋ᠢᠨ ᠠᠪᠤᠷᠭᠤ ᠰᠢᠯᠭᠠᠷᠠᠭᠤᠯᠬᠤ ᠲᠡᠮᠡᠴᠡᢉᠡᠨ ᠪᠣᠯᠤᠯᠤᠭᠠ᠃ ᠲᠡᠮᠡᠴᠡᢉᠡᠨ ᠳ᠋ᠦ ᠑᠖ ᠻᠯᠦᠪ ᠦ᠋ᠨ ᠑᠓᠐ ᠣᠷᠴᠢᠮ ᠲᠠᠮᠢᠷᠴᠢᠨ ᠣᠷᠤᠯᠴᠠᠭᠰᠠᠨ ᠪᠥᢉᠡᠳ ᠣᠯᠠᠨ ᠤᠯᠤᠰ ᠤ᠋ᠨ ᠡᠷᢈᠡ ᠲᠡᠢ ᠑᠔ ᠰᠢᢉᠦᢉᠴᠢ ᠠᠵᠢᠯᠯᠠᠵᠡᠢ᠃ ᠡᠨᠡ ᠵᠢᠯ ᠦ᠋ᠨ ᠬᠤᠪᠢ ᠳ᠋ᠤ ᠨᠡᠶᠢᠰᠯᠡᠯ ᠦ᠋ᠨ ᠶᠢᠰᠦᠨ ᠳᠡᢉᠦᠷᢉᠡ ᠡᠴᠡ ᠭᠠᠳᠠᠨᠠ ᠒᠑ ᠠᠶᠢᠮᠠᠭ ᠤ᠋ᠨ ᠲᠠᠮᠢᠷᠴᠢᠳ ᠨᠡᢉᠡᢉᠡᠯᠲᠡ ᠲᠡᠢ ᠣᠷᠤᠯᠴᠠᠵᠤ ᠪᠠᠶᠢᠭᠠ ᠪᠠᠷ ᠢ᠋ᠶᠠᠨ ᠣᠨᠴᠠᠯᠢᠭ᠃
Хоёр өдөр үргэлжилсэн тэмцээний шилдгүүдэд Нийслэлийн Засаг даргын Нийгмийн салбар, ногоон хөгжил болон агаар, орчны бохирдлын асуудал хариуцсан орлогч З.Төмөртөмөө, Монголын ширээний теннисний холбооны ерөнхий нарийн бичгийн дарга С.Галбадрах нар шагнал гардуулсан юм. Мөн энэ үеэр хоёр шилдэг тамирчинд Нийслэлийн Засаг дарга бөгөөд Улаанбаатар хотын Захирагчийн “Жуух бичиг” гардуулав.
ᠬᠣᠶᠠᠷ ᠡᠳᠦᠷ ᠦᠷᢉᠦᠯᠵᠢᠯᠡᢉᠰᠡᠨ ᠲᠡᠮᠡᠴᠡᢉᠡᠨ ᠦ᠋ ᠰᠢᠯᠢᠳᠡᢉ ᠦᠳ ᠲᠦ ᠨᠡᠶᠢᠰᠯᠡᠯ ᠦ᠋ᠨ ᠵᠠᠰᠠᠭ ᠳᠠᠷᠤᠭᠠ ᠶ᠋ᠢᠨ ᠨᠡᠶᠢᢉᠡᠮ ᠦ᠋ᠨ ᠰᠠᠯᠪᠤᠷᠢ᠂ ᠨᠣᠭᠤᠭᠠᠨ ᢈᠥᢉᠵᠢᠯ ᠪᠣᠯᠤᠨ ᠠᠭᠠᠷ᠂ ᠣᠷᠴᠢᠨ ᠤ᠋ ᠪᠣᢈᠢᠷᠳᠠᠯ ᠤ᠋ᠨ ᠠᠰᠠᠭᠤᠳᠠᠯ ᠬᠠᠷᠢᠭᠤᠴᠠᠭᠰᠠᠨ ᠣᠷᠤᠯᠠᠭᠴᠢ ᠵᠠ᠃ᠲᠡᠮᠦᠷᠲᠦᠮᠡ᠂ ᠮᠣᠩᠭᠣᠯ ᠤ᠋ᠨ ᠰᠢᠷᠡᢉᠡᠨ ᠦ᠋ ᠲᠧᠨᠨᠢᠰ ᠦ᠋ᠨ ᠬᠣᠯᠪᠤᠭᠠᠨ ᠤ᠋ ᠶᠡᠷᠦᠩᢈᠡᠢ ᠨᠠᠷᠢᠨ ᠪᠢᠴᠢᢉ ᠦᠨ ᠳᠠᠷᠤᠭᠠ ᠰ᠃ᠭᠠᠯᠪᠠᠳᠠᠷᠠᠬᠤ ᠨᠠᠷ ᠱᠠᠩᠨᠠᠯ ᠭᠠᠷᠳᠠᠭᠤᠯᠤᠭᠰᠠᠨ ᠶᠠᠭᠤᠮᠠ᠃ ᠮᠥᠨ ᠡᠨᠡ ᠦᠶᠡ ᠪᠡᠷ ᠬᠣᠶᠠᠷ ᠰᠢᠯᠢᠳᠡᢉ ᠲᠠᠮᠢᠷᠴᠢᠨ ᠳ᠋ᠤ ᠨᠡᠶᠢᠰᠯᠡᠯ ᠦ᠋ᠨ ᠵᠠᠰᠠᠭ ᠳᠠᠷᠤᠭᠠ ᠪᠥᢉᠡᠳ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ ᠶ᠋ᠢᠨ ᠵᠠᢈᠢᠷᠤᠭᠴᠢ ᠶ᠋ᠢᠨ “ᠵᠢᠭᠤᠬᠤ ᠪᠢᠴᠢᢉ” ᠭᠠᠷᠳᠠᠭᠤᠯᠪᠠ᠃
Нийслэлийн Засаг даргын орлогч З.Төмөртөмөө: ᠨᠡᠶᠢᠰᠯᠡᠯ ᠦ᠋ᠨ ᠵᠠᠰᠠᠭ ᠳᠠᠷᠤᠭᠠ ᠶ᠋ᠢᠨ ᠣᠷᠤᠯᠠᠭᠴᠢ ᠵᠠ᠃ᠲᠡᠮᠦᠷᠲᠥ᠋ᠮᠦ:
᠆ᠰᠫᠤᠷᠲ ᠪᠦᠷᠢ ᠥᠪᠡᠷ ᠥᠪᠡᠷ ᠦ᠋ᠨ ᠣᠨᠴᠠᠯᠢᠭ᠂ ᠳᠦᠷᠢᠮ᠂ ᠳᠠᠪᠠᠭᠤ ᠲᠠᠯᠠ ᠲᠠᠢ ᠪᠠᠶᠢᠳᠠᠭ᠃ ᠰᠢᠷᠡᢉᠡᠨ ᠦ᠋ ᠲᠧᠨᠨᠢᠰ ᠰᠡᢉᠦᠯ ᠦ᠋ᠨ ᠵᠢᠯ ᠦ᠋ᠳ ᠲᠦ ᠡᠷᠴᠢᠮ ᠲᠡᠢ ᢈᠥᢉᠵᠢᠵᠦ ᠪᠠᠶᠢᠨᠠ᠃ ᠡᠨᠡ ᢈᠥᢉᠵᠢᠯ ᠦ᠋ᠨ ᠭᠣᠣᠯ ᠲᠤᠯᠭᠠᠭᠤᠷ ᠨᠢ ᠰᠢᠷᠡᢉᠡᠨ ᠦ᠋ ᠲᠧᠨ᠋ᠨᠢᠰ ᠦ᠋ᠨ ᠬᠣᠯᠪᠤᠭᠠᠳ ᠤ᠋ᠨ ᠨᠢᢉᠡᠳᠦᠯ᠂ ᠪᠠᠭᠰᠢ᠂ ᠳᠠᠰᠬᠠᠯᠵᠢᠭᠤᠯᠤᠭᠴᠢ᠂ ᠰᠢᢉᠦᢉᠴᠢ᠂ ᠲᠠᠮᠢᠷᠴᠢᠳ ᠲᠠ ᠪᠦᢉᠦᠳᠡ ᠶᠠᠭᠤᠮᠠ ᠰᠢᠦ᠃ ᠨᠡᠶᠢᠰᠯᠡᠯ ᠦ᠋ᠨ ᠵᠦᢉ ᠡᠴᠡ ᠡᠨᠡ ᢈᠦ ᠲᠡᠮᠡᠴᠡᢉᠡᠨ ᠢ᠋ ᠵᠢᠯ ᠪᠦᠷᠢ ᠳᠡᠮᠵᠢᠨ᠂ ᠤᠯᠠᠮᠵᠢᠯᠠᠯ ᠪᠣᠯᠭᠠᠨ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠨᠠ᠃ ᠡᠨᠡ ᠵᠢᠯ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠᠨᠠ ᠰᠢᠷᠡᢉᠡᠨ ᠦ᠋ ᠲᠧᠨᠨᠢᠰ ᠦ᠋ᠨ ᠠᠽᠢ ᠲᠢᠶᠢᠪ ᠦ᠋ᠨ ᠠᠬᠠᠮᠠᠳ ᠤ᠋ᠨ ᠠᠪᠤᠷᠭᠤ ᠰᠢᠯᠭᠠᠷᠠᠭᠤᠯᠬᠤ ᠲᠡᠮᠡᠴᠡᢉᠡᠨ᠂ ᠮᠥᠨ ᠵᠡᢉᠦᠨ ᠠᠽᠢ ᠶ᠋ᠢᠨ ᠵᠠᠯᠠᠭᠤᠴᠤᠤᠯ ᠤ᠋ᠨ ᠨᠠᠭᠠᠳᠤᠮ ᠪᠣᠯᠤᠨᠠ᠃ ᠲᠡᠶᠢᠮᠦ ᠡᠴᠡ ᠲᠠ ᠪᠦᢈᠦᠨ ᠪᠡᠯᠡᠳᢈᠡᠯ ᠢ᠋ᠶᠡᠨ ᠰᠠᠶᠢᠨ ᠪᠠᠵᠠᠭᠠᠵᠤ᠂ ᠡᠳᠡᢉᠡᠷ ᠲᠡᠮᠡᠴᠡᢉᠡᠨ ᠳ᠋ᠦ ᠠᠮᠵᠢᠯᠲᠠ ᠲᠠᠢ ᠣᠷᠤᠯᠴᠠᠭᠠᠷᠠᠢ᠃ ᠤᠯᠤᠰ ᠣᠷᠤᠨ ᠤ᠋ ᠪᠠᠨ ᠨᠡᠷᠡ ᠶ᠋ᠢ ᠲᠢᠢᠪ᠂ ᠳᠡᠯᠡᢈᠡᠢ ᠳ᠋ᠦ ᠠᠯᠳᠠᠷᠰᠢᠭᠤᠯᠬᠤ ᠬᠠᠮᠤᠭ ᠤ᠋ᠨ ᠭᠣᠣᠯ ᢈᠦᠮᠦᠨ ᠪᠣᠯ ᠲᠠᠮᠢᠷᠴᠢᠳ ᠲᠠ ᠪᠦᢉᠦᠳᠡ ᠶᠠᠭᠤᠮᠠ ᠰᠢᠦ ᢉᠡᠪᠡ᠃
Ирэх зургаадугаар сарын 18-23-нд Ази тивийн ахмадын аварга шалгаруулах тэмцээн Улаанбаатар хотноо болох аж. Мөн наймдугаар сарын 16-23-ны өдрүүдэд “Улаанбаатар 2023” Зүүн Азийн залуучуудын наадмыг зохион байгуулах юм. Энэ удаагийн хотын аварга шалгаруулах тэмцээнийг Азийн томоохон наадмуудын өмнө зохион байгуулж байгаагаараа онцлогтой бөгөөд тамирчдын хувьд сорил, бэлтгэл болж байгааг зохион байгуулагчид онцолж байлаа. ᠢᠷᠡᢈᠦ ᠵᠢᠷᠭᠤᠭᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠑᠘᠆ ᠒᠓ ᠨᠳᠤ ᠠᠽᠢ ᠲᠢᠶᠢᠪ ᠦ᠋ᠨ ᠠᠬᠠᠮᠠᠳ ᠤ᠋ᠨ ᠠᠪᠤᠷᠭᠤ ᠰᠢᠯᠭᠠᠷᠠᠭᠤᠯᠬᠤ ᠲᠡᠮᠡᠴᠡᢉᠡᠨ ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠᠨᠤᠭᠠ ᠪᠣᠯᠬᠤ ᠠᠵᠢ᠃ ᠮᠥᠨ ᠨᠠᠶᠢᠮᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠑᠖᠆᠒᠓ ᠨ ᠤ᠋ ᠡᠳᠦᠷ ᠦ᠋ᠳ ᠲᠦ “ᠤᠯᠠᠭᠠᠨᠪᠠᠭᠠᠲᠤᠷ ᠒᠐᠒᠓” ᠵᠡᢉᠦᠨ ᠠᠽᠢ ᠶ᠋ᠢᠨ ᠵᠠᠯᠠᠭᠤᠴᠤᠤᠯ ᠤ᠋ᠨ ᠨᠠᠭᠠᠳᠤᠮ ᠢ᠋ ᠵᠣᢈᠢᠶᠠᠨ ᠪᠠᠶᠢᠭᠤᠯᠬᠤ ᠶᠠᠭᠤᠮᠠ᠃ ᠡᠨᠡ ᠤᠳᠠᠭᠠ ᠶ᠋ᠢᠨ ᠬᠣᠲᠠ ᠶ᠋ᠢᠨ ᠠᠪᠤᠷᠭᠤ ᠰᠢᠯᠭᠠᠷᠠᠭᠤᠯᠬᠤ ᠲᠡᠮᠡᠴᠡᢉᠡᠨ ᠢ᠋ ᠠᠽᠢ ᠶ᠋ᠢᠨ ᠲᠣᠮᠤᠬᠠᠨ ᠨᠠᠭᠠᠳᠤᠮ ᠤ᠋ᠳ ᠤ᠋ᠨ ᠡᠮᠦᠨᠡ ᠵᠣᢈᠢᠶᠠᠨ ᠪᠠᠶᠢᠭᠤᠯᠵᠤ ᠪᠠᠶᠢᠭᠠ ᠪᠠᠷ ᠢ᠋ᠶᠠᠨ ᠣᠨᠴᠠᠯᠢᠭ ᠲᠠᠢ ᠪᠥᢉᠡᠳ ᠲᠠᠮᠢᠷᠴᠢᠳ ᠤ᠋ᠨ ᠬᠤᠪᠢ ᠳ᠋ᠤ ᠰᠣᠷᠢᠯ᠂ ᠪᠡᠯᠡᠳᢈᠡᠯ ᠪᠣᠯᠵᠤ ᠪᠠᠶᠢᠭᠠ ᠶ᠋ᠢ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠭᠴᠢᠳ ᠣᠨᠴᠠᠯᠠᠵᠤ ᠪᠠᠶᠢᠯᠠ᠃
Ташрамд, 1994 оноос хойш 22 жил завсардаад байсан тус тэмцээнийг 2016 оноос эхлэн жил бүр зохион байгуулж байгаа. Тэмцээнийг 10 хүртэлх насны таван ангилал, өсвөрийн насны /11-12, 13-15, 16-18 нас/ гурван ангилал, залуучуудын төрөл буюу 18-40 нас, ахмадын насны /40-49, 50-59, 60-69, 70-аас дээш нас/ дөрвөн ангиллаар зохион байгуулдаг. Тэмцээнийг НЗДТГ, Нийслэлийн Биеийн тамир, спортын газар, Монголын Ширээний теннисний холбоо хамтран зохион байгууллаа. ᠲᠠᠰᠢᠷᠠᠮ ᠳ᠋ᠤ᠂ ᠑᠙᠙᠔ ᠣᠨ ᠠ᠋ᠴᠠ ᠬᠣᠶᠢᠰᠢ ᠒᠒ ᠵᠢᠯ ᠵᠠᠪᠰᠠᠷᠳᠠᠭᠠᠳ ᠪᠠᠶᠢᠭᠰᠠᠨ ᠲᠤᠰᠠ ᠲᠡᠮᠡᠴᠡᢉᠡᠨ ᠢ᠋ ᠒᠐᠑᠖ ᠣᠨ ᠠ᠋ᠴᠠ ᠡᢈᠢᠯᠡᠨ ᠵᠢᠯ ᠪᠦᠷᠢ ᠵᠣᢈᠢᠶᠠᠨ ᠪᠠᠶᠢᠭᠤᠯᠵᠤ ᠪᠠᠶᠢᠭᠠ᠃ ᠲᠡᠮᠡᠴᠡᢉᠡᠨ ᠢ᠋ ᠑᠐ ᢈᠦᠷᠲᠡᠯᠡᢈᠢ ᠨᠠᠰᠤᠨ ᠤ᠋ ᠲᠠᠪᠤᠨ ᠠᠩᢉᠢᠯᠠᠯ᠂ ᠥᠰᠪᠦᠷᠢ ᠶ᠋ᠢᠨ ᠨᠠᠰᠤᠨ ᠤ᠋ /᠑᠑᠆᠑᠒᠂ ᠑᠓᠆᠑᠕᠂ ᠑᠖᠆᠑᠘ ᠨᠠᠰᠤ/ ᠭᠤᠷᠪᠠᠨ ᠠᠩᢉᠢᠯᠠᠯ᠂ ᠵᠠᠯᠠᠭᠤᠴᠤᠤᠯ ᠤ᠋ᠨ ᠲᠥᠷᠦᠯ ᠪᠤᠶᠤ ᠑᠘᠆᠔᠐ ᠨᠠᠰᠤ᠂ ᠠᠬᠠᠮᠠᠳ ᠤ᠋ᠨ ᠨᠠᠰᠤᠨ ᠤ᠋ /᠔᠐᠆᠔᠙᠂ ᠕᠐᠆᠕᠙᠂ ᠖᠐᠆᠖᠙᠂ ᠗᠐᠆ ᠠ᠋ᠴᠠ ᠳᠡᢉᠡᢉᠰᠢ ᠨᠠᠰᠤ/ ᠳᠥᠷᠪᠡᠨ ᠠᠩᢉᠢᠯᠠᠯ ᠢ᠋ᠶᠠᠷ ᠵᠣᢈᠢᠶᠠᠨ ᠪᠠᠶᠢᠭᠤᠯᠳᠠᠭ᠃ ᠲᠡᠮᠡᠴᠡᢉᠡᠨ ᠢ᠋ ᠨᠵᠤᠳᠠᠭ᠂ ᠨᠡᠶᠢᠰᠯᠡᠯ ᠦ᠋ᠨ ᠪᠡᠶᠡ ᠶ᠋ᠢᠨ ᠲᠠᠮᠢᠷ᠂ ᠰᠫᠤᠷᠲ ᠤ᠋ᠨ ᠭᠠᠵᠠᠷ᠂ ᠮᠣᠩᠭᠣᠯ ᠤ᠋ᠨ ᠰᠢᠷᠡᢉᠡᠨ ᠦ᠋ ᠲᠧᠨᠨᠢᠰ ᠦ᠋ᠨ ᠬᠣᠯᠪᠤᠭᠠ ᠬᠠᠮᠲᠤᠷᠠᠨ ᠵᠣᢈᠢᠶᠠᠨ ᠪᠠᠶᠢᠭᠤᠯᠤᠯᠠ᠃
